مامە کۆڕنۆی ڕاکشاوی گردەکەی سەیوانەکەم
سەر ڕەحەت، دڵ بگرێ، گوێ شل کە بۆ داستانەکەم
سەیرە، بەزمه، هەڵپەڕینە، پڕ لە قاقا و خەندەیه
نەعرەتەی گوێ کەڕ ئەکا، جۆش و کوڵی سەیرانەکەم
ئەرخەوان سوورە، بەهارە، گوڵشەنە، ڕازاوەیە
دەشت و کۆ ڕەنگین و پڕ شۆیە وەنەوشەی یانەکەم
خەرمەنی لالە لە کۆهساران و پێدەشت و نشێو
سوورترە لەو خوێنە باریوەی کوڵی گریانەکەم
دلبەران سرک و بەناز بەو تی نەرم و ئیستەکەی
سەد توانج ئەگرێتە ئاهووی دەشتەکەی شیروانەکەم
هەڵبڕە چاوی نمایش تێر سەرنجی ورد بدە
وەک بەجێت هێشت وا نەماوە شارەکەی جارانەکەم
مامە کوڕنوو چی بڵێم زیاتر لەوەی خالس ئەڵێ
فێست و ڕێوی و مێزەر و مەیموونە سەیری بانەکەم
وەک وتم: سەیرە لە بانە یا وەکوو نالی ئەڵێ
زیندەگیم تاڵە کە زەلکاو بێ بە تیمار خانەکەم
شیعر : ساڵەح دیلان
نظرات شما عزیزان:
برچسبها: شعر - ساڵەح دیلان -مامه کۆڕنۆ